والله لسه بدرى ياشهر الصيام ..

زمان كانت امى تبكى على رمضان فى ايامه الاخيرة وتقول بحسه رجل طيب جه يزورنا وحبيناه وماشى او ملاك من السما ومروح كنت بفرح برمضان وانا صغيرة عشان هصوم واعمل نفسى كبيرة زيهم والله كنت بفرح بالصيام معرفش ليه بس اللى كنت فاكراه اوى اوى انى كنت بفرح بالزينة والفانوس والفوازير والف ليله وليله ^^ كنت فاكرة ان هوة ده رمضان على شوية كنافه وقمر الدين وقطايف وزبيب وجوز الهند :D وكنت مخبيش عليكو افرح اوى اوى فى الايام الاخيرة هنزل بقى مع ماما اشترى لبس العيد واخده فى حضنى لغاية العيد الصبح واخرج والعب وبالونات ومراجيح وكده ^^ وابقى عاوزة الايام تمر بسرعه بقى ورمضان يخلص كفايه عليه اوى كده :) دلوقتى عرفت يعنى ايه العشر الاواخر والليالى اللى بكل الليالى اللى متساويهاش ولا الف ليلة وليله وعرفت ليه امى كانت بتبكى مبقتش استغرب زى زمان بل بقيت انا اللى نفسى ابكى من جوه قلبى مش عاوزاه يمشى رمضان الراجل الطيب او الملاك زى ماما ما بتقول  بجد بقيت بحس بالحزن لدرجة مبقتش احس فرحة العيد ولا استناه رمضان مش بس شهر كريم وروحانيات ومغفرة وسكينة وراحة وشياطين غايبة ومتسلسلة رمضان لمة مبنتلمش يمكن زيها طول السنة رمضان حضن لهمومنا واوجاعنا رمضان بركة رمضان حاجات كتير بتعملها وتشترك فيها كل الناس فى نفس التوقيت سحور وفطور وصلاة ودعاء ودعوة وسؤال الجنة والعتق من النار ..
 تدوينة كده ع الماشى و متوقفه عن التدوين الى بعد العشر الاواخر على خير ان شاء الله :)